ഹൃദയഗവേഷണം

ഗുൽമോഹറിന്റെ വേരു തേടിയ യാത്രയിൽ
കാലിൽ തടഞ്ഞത് ഉപേക്ഷിക്കപ്പെട്ട ഹൃദയം ;

ഊഞാൽപ്പാട്ടിന്റെ ഹാങ്ങോവറിൽ

സ്വയം ഒടുങ്ങിയത്..,
മുല്ലപ്പൂ മണക്കുന്ന ഇടവഴിയിൽ
കളഞ്ഞു പോയത്..,

കാക്കപ്പൂവിനും കദളിക്കുമൊപ്പം നാടുവിട്ടത് ..

ഇടിമിന്നലിന്റെ പൂമരങ്ങൾ ,
കൊടുങ്കാറ്റിന്റെ പ്രാചീന ഗുഹകൾ ,
മഴയുടെ നീണ്ട ഇടനാഴികൾ പകുത്തെടുത്തത് ,
പ്രണയത്തിന്റെ ലാവാ പ്രവാഹം
നെടുകേ പിളർന്നത്..,

സൌഹൃദക്കൂട്ടത്തിൽ നിന്നൊരരൂപി ചോദിച്ചു ;
ഹൃദയ ശേഖരണമാണല്ലോ നിന്റെ വിനോദം.. ?
കൂട്ടുകാരാ , ഉടലിന്റെ അദൃശ്യതയിൽ

നിന്റെ വാക്കുകളുദാരം , പ്രണയനിർഭരം ,

എങ്കിലും പ്രണയസങ്കേതങ്ങളുടെ

ചുരുക്കെഴുത്തുകൾ അതിപുരാതനം ,

വായിച്ചെടുക്കാം

രതി കാമനകളുടെ ക്ലാവു മണം,

പ്രണയം ട്രപ്പീസിന്റെ മെയ്യൊതുക്കമല്ല ..,

കടം കൊണ്ട വാക്കുകളുടെ ധൂർത്തല്ല ,

അഴിമുഖത്തിന്റെ നിലയ്ക്കാത്ത സംഘർഷം ,

നിന്റെ ചൂണ്ടു വിരൽത്തുമ്പു കൊണ്ടല്ല ,

പ്രണയം കൊണ്ടു നീ പ്രണയം തേടണം ,

ഗുൽമോഹറിന്റെ വേരു തേടിയ യാത്രയിൽ

കാലിൽ തടഞ്ഞത് ഉപേക്ഷിക്കപ്പെട്ട ഹൃദയം ;

ചോര വാർന്നത് ...

പ്രണയം വാർന്നത് ...